Azərbaycan Respublikası və Almaniya Federativ Respublikası arasında ikitərəfli münasibətlər

Azərbaycan Respublikası və Almaniya Federativ Respublikası arasında ikitərəfli münasibətlər.

Azərbaycan ilə Almaniya arasında 1992-ci il fevralın 20-də qurulan diplomatik əlaqələr bu gün də fəal şəkildə inkişaf edir. 2018-ci ildə Almaniyanın sabiq Kansleri Angela Merkel Azərbaycana səfərə gəlmişdi. Bakıya növbəti tarixi səfəri isə aprelin 2-də Almaniya Federativ Respublikasının Prezidenti Frank-Valter Ştaynmayer həyata keçirdi. Bu səfər ikitərəfli münasibətlərin möhkəmləndirilməsi və regional təhlükəsizlik məsələlərinin müzakirəsi baxımından mühüm əhəmiyyət daşıyır.Azərbaycan və Almaniya ölkələri arasında iqtisadi əlaqələrin inkişafının tarixi kökləri var. Hələ XIX əsrdə Azərbaycanda alman koloniyaları mövcud olmuşdur ki, bu da şərabçılığın və mədəni mübadilənin inkişafına töhfə vermişdir. Bu gün ölkələr əlaqələri, o cümlədən yaşıl enerji və nəqliyyat logistikası layihələrini gücləndirməkdə davam edir. Ümumiyyətlə, Azərbaycanın enerji sektorunda Almaniya ilə tərəfdaşlığı təqdirəlayiqdir. Belə ki, Almaniya Cənub Qaz Dəhlizi vasitəsilə Azərbaycanın təbii qazının Avropaya nəqlində maraqlıdır. Bundan əlavə, alternativ və bərpa olunan enerji mənbələri sahəsində əməkdaşlıq da genişlənir. Azərbaycan xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindədir və bu, tam realdır, bunun bir hissəsi Avropaya ixrac ediləcəkdir. Ticarət əlaqələri də önəmlidir – Almaniya Azərbaycanın əsas idxal və ixrac tərəfdaşlarından biridir. Almaniyanın qabaqcıl sənaye texnologiyaları ölkəmizin müxtəlif sektorlarının modernləşdirilməsinə töhfə verir. Eyni zamanda, Almaniya Azərbaycanın tranzit imkanlarını da yüksək qiymətləndirir.   Azərbaycan inkişaf edərək elə bir məkana çevrilir ki, buradan çox vacib ticarət yolları keçir və bu da dünyanın birləşməsinə səbəb ola bilər. Bundan başqa, elm, təhsil və mədəniyyət sahəsində də əməkdaşlıq arzulanan səviyyədədir. Almaniyada təhsil alan azərbaycanlı tələbələrin sayı getdikcə artır, eləcə də iki ölkə arasında akademik və mədəni mübadilələr inkişaf edir. Rəsmi Berlin Azərbaycanla elm sahəsində, eləcə də tələbə mübadilə proqramlarının reallaşdırılmasında ölkəmzilə sıx əməkdaşlıq etməyə hazırdır. Azərbaycan gəncləri Almaniyada təhsil almağa böyük maraq göstərirlər .Beləliklə, Almaniya Federal Prezidenti Frank-Valter Ştaynmayerin Azərbaycana səfəri 2 ölkə arasındakı münasibətlərdə mühüm mərhələ oldu. Əsas müzakirə istiqamətlərindən biri enerji sahəsində əməkdaşlığın genişləndirilməsi, Azərbaycan təbii qaz ixracını artırmaq və bərpa olunan enerji layihələrini inkişaf etdirməklə Avropanın enerji təhlükəsizliyinin təmin edilməsində etibarlı tərəfdaş kimi rolunu təsdiqlədi. Bundan əlavə, səfər iqtisadi əlaqələrin möhkəmlənməsinə töhfə verdi. Dövlət başçımız alman sahibkarlarının Azərbaycan iqtisadiyyatına göstərdiyi diqqətdən məmnunluğunu ifadə etdi və onları xüsusilə bərpa olunan enerji mənbələri sahəsində daha fəal əməkdaşlığa çağırdı. Həmçinin regional təhlükəsizlik məsələləri və Azərbaycan və Ermənistan arasında münasibətlərin normallaşdırılması prosesi müzakirə olundu. Hər iki tərəf sülh danışıqlarının davam etdirilməsində maraqlı olduqlarını bildirərək regionda sabitliyin vacibliyini vurğuladılar. Azərbaycan lideri sülh müqaviləsinin imzalanmasında maraqlı olduğunu növbəti dəfə bəyan etdi, ancaq bunun baş verməsi üçün Ermənistanan atmalı olduğu addımları da sadaladı.

 İsaqbağı kənd tam orta ümumtəhsil məktəbinin direktoru-Dayangül Vəliyeva.

COP29 beynəlxalq iqlim konfransı uğurlu nəticələr əldə etdi.

Aprelin 2-də Almaniya Federativ Respublikasının Prezidenti Frank-ValterŞtaynmayerin Azərbaycana  rəsmi səfəri Azərbaycan-Almaniya əlaqələrinin dərinləşməsinə və yeni əməkdaşlıq istiqamətlərinin müəyyən edilməsinə təkan verəcək.Azərbaycan və Almaniya arasında iqtisadi əməkdaşlıq son dövrlərdə dinamik şəkildə inkişaf edir. 2024-cü ilin ilk iki ayında ticarət dövriyyəsinin üç dəfə artması, xüsusilə xam neft ixracının həcminin yüksəlməsi, bu əlaqələrin möhkəmləndiyini göstərir. Prezident cənab  İlham Əliyevin bəyanatında vurğulandığı kimi, gələcəkdə ticarət dövriyyəsinin daha da şaxələndirilməsi nəzərdə tutulur. Xüsusilə bərpaolunan enerji sahəsində əməkdaşlıq böyük perspektivlər vəd edir. Bu sahədə Almaniya şirkətləri ilə tərəfdaşlıq mühüm əhəmiyyət kəsb edir. Hər iki ölkə rəhbərinin çıxışı, verdikləri bəyanatlar göstərir ki, bu səfər Azərbaycan-Almaniya əlaqələrində yeni əməkdaşlıq səhifəsi açacaq. Cənab Prezident İlham Əliyev qeyd etdi ki, həm təkbətək görüşdə söhbət əsnasında, həm də nümayəndə heyətlərinin iştirakı ilə aparılan danışıqlarda Almaniya-Azərbaycan əlaqələrinin gələcək inkişafı müzakirə edilmişdir: “Mən tam əminəm ki, bu səfər bizim əlaqələrimizə yeni müsbət təkan verəcəkdir. İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində – harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var. Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”.Çıxışında Azərbaycanın yüksək peşəkarlıqla evsahibliyi etdiyi COP29-u  xatırladan ölkə rəhbərinin qeyd etdiyi kimi, Azərbaycanın COP29 beynəlxalq iqlim konfransına ev sahibliyi etməsi ölkənin qlobal iqlim gündəliyindəki rolunu möhkəmləndirdi. 197 ölkədən 77 mindən çox nümayəndənin qatıldığı konfransda Azərbaycan və Almaniya arasında ekoloji sahədə əməkdaşlıq məsələləri müzakirə olundu.  Ermənistanın bu beynəlxalq tədbirdə iştirak etməməsi, regional əməkdaşlıq perspektivlərinə mənfi təsir göstərmə cəhdləri fiaskoya uğradı. Azərbaycanın sülh və sabitlik siyasəti çoxlarına nümunədir, o cümlədən qonşu dövlətlərə. Prezident İlham Əliyevin bəyanatında Azərbaycanın 30 il ərzində erməni işğalından əziyyət çəkməsi, beynəlxalq təşkilatların bu münaqişəyə ciddi müdaxilə etməməsi və ölkəmizin öz gücü ilə ədaləti bərpa etməsi xüsusi vurğulandı.  Qarabağ Zəfəri regionda sülh prosesini sürətləndirdi və bu gün Azərbaycan-Ermənistan münasibətləri daha konstruktiv müstəviyə keçməkdədir. Almaniya ilə aparılan müzakirələr zamanı bu məsələnin də önə çəkilməsi, ikitərəfli münasibətlərin təkcə iqtisadi deyil, həm də siyasi müstəvidə inkişaf etdiyini göstərir.

Şıxbağı kənd tam orta ümumtəhsil məktəbinin direktoru-Sabir Əhmədov.