Gərginliyin azalmasına xidmət edən razılıq

Gərginliyin azalmasına xidmət edən razılıq.

Brüsseldə Vətən müharibəsindən sonra Azərbaycan, Avropa İttifaqı və Ermənistanın liderlərinin sayca ikinci olan üçtərəfli görüş keçirildi. Bu formatda ilk üçtərəfli görüş 14 dekabr 2021- ci ildə keçirilib və nəticə etibarilə, Prezident İlham Əliyev və Şarl Mişel tərəfindən Brüssel sülh gündəliyinin əsası qoyulub. Bunun davamı olaraq tərəflər arasında intensiv təmaslar aparılıb, telefon danışıqları keçirilib.Avropa İttifaqı Şurasının Prezidentinin bəyanatında ilk diqqəti çəkən məqam həm Prezidentimiz cənab İlham Əliyev, həm də Baş nazir Nikol Paşinyanın sülh müqaviləsinin reallaşması üçün öz istəklərini bəyan etməsi və bu məqsədlə hər iki ölkə XİN rəhbərlərinə müvafiq tapşırıqlarını verilməsinə dair hissədir. Bu isə o anlama gəlir ki, Ermənistan Azərbaycanın irəli sürdüyü 5 maddədən ibarət təklifini qəbul edib. Burada isə ən əsas məqam Azərbaycanın ərazi bütövlüyünün Ermənistan tərəfindən tanınması idi.Önəmli məqamlardan biri də Azərbaycan və Ermənistsanın sərhəd məsələləri üzrə birgə komissiya yaratması və ilk növbədə sərhədlərin delimitasiya prosesinə başlaması barədə razılıq əldə olunmasıdır. Əvvəllər də bu istiqamətdə təşəbbüslər olsa da, proses uzanmış, demək olar ki, dalana dirənmişdi. Lakin bu görüşdə hər iki tərəf konkret olaraq aprel ayının sonuna qədər Birgə Sərhəd Komissiyanın yaradılmasına dair öhdəlik götürdülər. Maraqlı məqam ondan ibarətdir ki, komissiya heç bir üçüncü tərəf və ya vasitəçi olmadan fəaliyyət göstərəcək.Bəyanatla Aİ-nin minalardan təmizləmə, itkin düşmüş şəxslərin tapılması, eləcədə quruculuq işlərində Azərbaycana dəstək göstərməsi də təsdiq olunur. İtkin düşmüş şəxslərin taleyinə aydınlıq gətirilməsi məsələsi daima Azərbaycan hökumətinin diqqətində olub. Həm prezident cənab İlham Əliyev, həm də müvafiq qurumların rəhbərləri keçirdiyi müntəzəm görüşlərdə bu məsələni gündəmə gətirir. Artıq Ermənistan rəhbərliyi də keçmişin qalığı olan həmsədrlik institutundan imtina etməyin vaxtının çatdığını anlamağa başlayıb.Bəyanatda, həmçinin qeyd olunur ki, hər iki ölkənin liderləri Cənubi Qafqazda kommunikasiyaların açılmasını da müzakirə edib. Dəmir yolu xətlərinin bərpası istiqamətində atılan addımlar, eyni zamanda Ermənistan və Azərbaycanı avtomobil yolu əlaqələrinin bərpası üçün effektiv həll yolları tapmağa çağırıb. Ermənistan və Azərbaycan arasında birbaşa danışıqları nəzərdə tutan yeni mexanizm və format yaranır. Burada isə əsas məqsəd ilk növbədə Azərbaycan-Ermənistan münasibətlərinin normallaşdırılmasıdır.

Çallı kənd tam orta məktəbin psixoloqu – Kərimli Eltun