Azərbaycanın Olimpiya Oyunlarında iştirakı və yüksək nailiyyətləri

Azərbaycanın Olimpiya Oyunlarında iştirakı və yüksək nailiyyətləri.

Dekabrın 24-də Azərbaycan Respublikasının Prezidenti İlham Əliyev 2024-cü ilin idman yekunlarına həsr olunmuş mərasimdə iştirak edib. Prezident cənab İlham Əliyev çıxışında Azərbaycan idmançılarının 2024-cü ildə beynəlxalq yarışlarda ölkəmizi ləyaqətlə təmsil edərək 1700-ə yaxın medal qazandıqlarını vurğulayıb. Bu, onu göstərir ki, idmanımız inkişaf edir, yeni nəsil idmançılar yetişir və beləliklə, Azərbaycan idman dövləti kimi öz gücünü müxtəlif beynəlxalq yarışlarda təsdiqləyir. Dövlət başçısı Yay Olimpiya Oyunlarında Azərbaycanın müstəqil ölkə kimi iştirak etdiyi dövrdə ən yüksək nəticəni əldə edərək komanda hesabında 30-cu yerdə qərarlaşdığını qeyd edib. Bu nailiyyətin Azərbaycanın idman dövləti kimi gücünü təsdiqlədiyini bildirib. Komandamız ikisi qızıl, ikisi gümüş, üçü bürünc olmaqla yeddi medal qazanaraq ölkəmizin idman şöhrətini bir daha yüksəklərə qaldırmışdır.

Bildirilib ki, gələn il Azərbaycan növbəti böyük idman yarışına ev sahibliyi edəcək, bu da MDB Oyunlarıdır.

İdman cəmiyyətimizin ayrılmaz hissəsidir. İdmanın və idman qələbələrinin ictimai məkanda çox böyük rolu var. Nəzərə alsaq ki, bu Yay Olimpiya Oyunlarında Azərbaycan müzəffər ölkə kimi, qalib ölkə kimi iştirak edirdi, idmançılarımız isə müzəffər xalqın nümayəndələri kimi iştirak edirdilər. Əlbəttə ki, bu vətənpərvərlik amili daim diqqətdə olmalıdır. Gənc nəslin vətənpərvərlik ruhunda tərbiyə edilməsində idman nə qədər vacibdirsə, bir o qədər də hərbi hazırlıq və fiziki hazırlıq vacibdir.

Fiziki güc mənəvi saflığa da yol açır və şadam ki, bizim idmançılarımızın mütləq əksəriyyəti idmanda da, məişətdə də, cəmiyyətdə də nümunədirlər, örnəkdirlər. Onların davranışı, cəmiyyətdəki fəaliyyəti məni və əminəm ki, bütün xalqımızı sevindirir. Azərbaycan gənci məhz belə olmalıdır – vətənpərvər, fiziki cəhətdən güclü, mənəvi cəhətdən saf, öz xalqına, dövlətinə bağlı, heç bir kənar təsirə boyun əyməyən və ləyaqətli. Əlbəttə ki, 1996-cı ildən bu yana bütün Olimpiya Oyunlarında iştirakımız, o cümlədən bu məqsədi daşıyırdı. Biz özümüzə də, dünyaya da sübut etməli idik və edirdik ki, biz güclü dövlətik. Hər dövlətin gücü isə onun xalqının gücünə söykənir.

Zərdab rayon Şıxbağı kənd tam orta məktəbinin direktoru-Sabir Əhmədov 

Üçüncü MDB Oyunları Azərbaycanda keçiriləcək.

III MDB Oyunlarının 2025-ci ildə Azərbaycanda keçirilməsi üzrə Təşkilat Komitəsi yaradılıb. Prezident İlham Əliyev iyulun 10-da bununla bağlı sərəncam imzalayıb. Sərəncamda qeyd olunur ki, “Müstəqil Dövlətlər Birliyinin iştirakçısı olan dövlətlərin bədən tərbiyəsi və idman sahəsində əməkdaşlığı haqqında Saziş” iştirakçılarının Bədən Tərbiyəsi və İdman Şurasının 2021-ci il 20 dekabr tarixli növbədənkənar iclasında III MDB Oyunlarının 2025-ci ildə Azərbaycanda keçirilməsi barədə qərar qəbul edilib. Azərbaycanın MDB Oyunları kimi əhəmiyyətli bir idman tədbirinə ev sahibliyi etməsi onun idman ölkəsi kimi artan nüfuzunun daha da möhkəmlənməsinə, gələcəkdə belə mühüm layihələrin respublikamızda yüksək səviyyədə təşkil edilməsinə müsbət təsir göstərəcək. Azərbaycanda III MDB Oyunları 2025-ci ilin oktyabr ayında keçirilməlidir.Bununla bağlı yaradılan Təşkilat Komitəsinin sədri Azərbaycan Respublikasının gənclər və idman naziridir. Nazirlik və digər dövlət qurumlarının, bir sıra şəhər-rayon icra hakimiyyətlərinin rəhbər və məsul şəxsləri Təşkilat Komitəsinin üzvləridir.

Qeyd edək ki, MDB Oyunları ideyası Rusiya tərəfindən irəli sürülüb və ilk dəfə 2021-ci ildə Kazan şəhərində (Tatarıstan) keçirilib. 2023-cü ildə II MDB Oyunlarını Belarusun paytaxtı Minsk qəbul edib. MDB Oyunlarının iki ildən bir keçirilməsi nəzərdə tutulur. 2025-ci ildə, həmçinin Azərbaycanın Gəncə şəhəri “MDB-nin idman paytaxtı” missiyasını daşıyacaq.

Zərdab rayon Salahlı kənd ümumi orta məktəbinin direktoru- Rəşad İsmayılov